کوردستانموزیك

ھونەرمەندێكی فارس لە ئیسپانیا گۆرانی بە زمانی كوردی دەڵێت

 

 

خاتوو یەڵدا هونەرمەندی فارسی بەڕەگەز ئێرانی کە دانیشتووی ئیسپانیایە لە فێستیڤاڵێکدا ڕێکەوتی ٢٨ی نۆڤەمبر لە بەرشلۆنە، گۆرانی کوردی بە زاراوەی کەڵهوڕی خوێند و سەرنج و هاندانی بەشداربووانی بۆ لای خۆی ڕاکێشا و خۆی دەڵێت ئەمە یەکەمجارە کە گۆرانی کوردی لەم ماوەی ژیانمدا دەبینم کە لە ئیسپانیا بەم شێوەیە پێشکەش دەکرێت.

یەڵدا لەدایکبووی تارانە و چەند ساڵێکە لە ئیسپانیا دەژی و لە دوو بواری ڕۆژنامەنووسی و زمانی ئیسپانیدا خاوەنی ماستەرنامەیە و لەگەڵ هەندێ ناوەندی ڕۆژنامەنووسی ئینگلیزی و ئەورووپی کاری کردووە. ناوبراو لە لێدوانێکدا تایبەتدا بۆ پشتی نیوز دەربارەی حەزی خۆی بۆ موسیقای نەتەوەکان وتی: “زۆر حەزم لە کولتووری جیاوازە و بۆ ناسینیان فێربوونی زمان و وتنەوەی موسیقاکەیانم هەڵبژاردووە و چوار ساڵە بەجددی و پرۆفێشناڵی گرنگی بە هونەر دەدەم و لە ساڵی ٢٠١٤ەوە لە بەرشلۆنە بەرهەمم بووە و بەیارمەتی هاوڕێیانم کە لە وڵاتگەلی جۆراوجۆرن گرووپی هونەری “بی، ئێس، ئێن”

واتە پڕۆژەی جیهانی موزیک-مان دامەزراندووە. ئامانجمان ئەوەیە لە ڕێی موسیقاوە هەموو سنوورەکانی سیاسی و جوغرافی بشکێنین و دژی ڕەگەزپەرستی هەڵوێستمان هەبێت”.

خاتوو یەڵدا کە زۆر گرنگی بە فولکلۆری وڵاتان و نەتەوەکان دەدات، سەبارەت بە کولتووری کورد و وتنی گۆرانی کوردی وتی: “زۆر حەزم لە کولتووری جوانی کوردە.

لە ساڵی ٢٠١٠ەوە خۆم فێری زمانی کوردی کرد و بەبێ مامۆستا بە تێکەڵاوی لەگەڵ خەڵک و گوێگرتن لە موسیقا و هەواڵەکان هەوڵم دا کوردییەکی باش قسە بکەم و بنووسم و تەنانەت لە زمانەکانی تریشەوە بۆ کوردی یان لە کوردییەوە بۆ زمانەکانی تر وەرگێڕانم هەبێ و یەکەم کاریشم وەرگێڕانی کورتە شیعرەکانی خوالێخۆشبوو شێرکۆ بێکەس بوو بۆ ئیسپانی کە کاتی خۆی لە سلێمانی چاپ کرا و هیوادارم لێرە بتوانم چاپی دووبارەی بکەم. دیالێکتەکانی زمانی کوردی دەزانم و بە هەر دوو ڕێنووسی ئارامی و لاتین دەنووسم. بۆیە فێر بووم چونکە حەزم لە زمانی کوردییە.

ئەم گۆرانییە کوردییە بە زاراوەی کەڵهوڕی کە لەم فێستیڤاڵەدا پێشکەشم کرد برای بەڕێزم کاک حەمید ئازموودە کە خەڵکی سنەیە و ئێستە لە تورکیا دەژی یارمەتیدەرم بوو“.

 


لەو فێستیڤاڵە بە زمانەکانی ئیسپانی، ئەفریقی، عیبری، فارسی، کوردی، پۆڵۆنی (لهستان)، ڕۆمانی، کەتالۆنی، پڕتەقاڵی و ئینگلیزی و تورکی گۆرانی پێشکەش کرا و خاتوو یەڵدا دەڵێت: “هەرچەند موسیقی زمانی هەست و ئیحساسی مرۆڤە بەڵام هەوڵ دەدەم پێش وتنی گۆرانییەکانم بە زمانگەلی جۆراوجۆر، پێشینەیەک و ناسینێک دەربارەی گۆرانییەکە بە بیسەران و خوازیارانی بدەم”. یەڵدا خانم فارسە و شارەزای تەواوی بەسەر پێنج زمانی ئینگلیزی، سپانی، تورکی، عەرەبی و کوردی هەیە واتە هەم قسەی پێ ئەکات و هەمیش هاوکات وەرگێڕانی ئەو زمانانە دەکات و لە دوو زمانی پڕتەقاڵی و ئیتاڵی-ش تێدەگات بەڵام قسەی پێ ناکات. دەتوانین بڵێین ئەم خاتوونە هەڵگری ٨ زمانە. ئەو دەربارەی هۆکاری هەڵبژاردنی وتنەوەی گۆرانی بە زمانی کوردی دەڵێت: “بۆیە کوردیم هەڵبژاردووە چونکە زۆر حەزم لە ئەدەب و زمان و کولتوورەکەیەتی و دەمەوێ ئەو کولتوورە جوانە بە خەڵکی ئێرە بناسێنم. کوردەکان لێرە ئەکتیڤ نییە و من دەمەوێ وەکو داکۆکیکارێکی بچووکی نەتەوەی کورد لێرە چیم پێ بکرێت ئەنجامی بدەم”.

 


خاتوو یەڵدا کە کاری وێنەگری و مۆدێلینگیش دەکات و لە چەند پێشانگە و فێستیڤاڵیش لەم بارەوە دەوری کارای لە وڵاتی ئیسپانیا گێڕاوە و تەنانەت جارێکیشیان لە فێستیڤاڵێکی جلوبەرگدا لەسەر خواست و هەوڵی خۆی نمایشکاری جلوبەرگی کوردی بووە؛ هیوا دەخوازێت کوردەکانیش لە ئیسپانیا دەوریان هەبێ بۆ ناساندنی کولتوور و زمان و نەتەوەکەیان و هەروەها پشتگیریش بکرێت لەو کەسانەی خزمەتی ئەم ناساندنەی کولتوور و ئەدەب و زمانی کوردی دەکەن و گلەیی لە ڕەوەندی کوردی هەیە لە ئیسپانیا کە دەتوانن دەوری کارا بگێڕن بەڵام دیار نین.

 

 

 

 

زیاتر ببینه

Related Articles

Back to top button
Close
Close